Hi Lanur agu Ine Weu

Manga ca leso hi Lanur ngo rimu uman. Uma ho’o te rimu diha Lanur toe uma hanangkoe. Cecupun di Lanur, cecupun di Ine-Weu. Maik hi Lanur rimu kole uma di Ine-Weu. Mai tae di Ine-Weu ngong hi lanur: “Ole, Lanur, co’o tara rimu le haun kole de daku uma ta? Ata poli taung pati danong, de hau cecupun daku cecupun. Apa rajan hau roeng kole dakum ga.” Mai wale di Lanur: “Diong leng danong le hau lingko ho’o ta, Ine-Weu?” “Lingko de empo dami danong ta, Lanur” wale di Ine-Weu. Mai kole tae di Lanur ngong hi Ine-Weu: “Danong lingko ho’o, tae data tu’a, lingko dami.” “Eme lingko de meu tu’ung ho’o, tae di Ine-Weu, wajo rampas taud.” “Di’a demeng to, ase-ka’e,” wale di Lanur. “Apa de hau?” tae di Lanur. “Wae daku,” wale di Ine-Weu. “Api daku,” tae di Lanur. “Niat rampas taud e?”, tae di Lanur. Mai wale di Ine-Weu: “Wa wae meset.” Poli hitu ise te su ngo nggere-wa wae mese hitu.

            Cai wa wae, hi Lanur kete api mese-mese. Agu hi Ine-Weu ka’eng kin du lobo watu. Mai tae di Lanur ngong hi Ine-Weu: “Co’o tara ka’eng bom keta hau ta, Ine-Weu?” “Ho’o wag dakun ta, pande-pande kali api de hau. Agu eme pesa api de hau to’ong le wae daku, daku ngaran lingko.” “Nggitu demeng,” wale di Lanur. Woko mese keta apai di Lanur ga, itu kali nggo’on tae di Ine-Weu: “Nega hau nitu ga.” Poli hitu kaok wae li Ine-Weu. Toe beheng api hitu pesa muing. Kete-kete nggo’o li Lanur api hitu, toe gorin te mose, ai kaok kin wae li Ine-Weu. Poli hitu tegi songgo li Lanur agu hi Ine-Weu hitu. Mai tae di Ine-Weu: “Kudu hau gi ko?” “Eng-e,” wale di Lanur. Woko hau kali kudu ge, daku morin Lingko hitu te rimu de hau.” Poli hitu ise te sua kole. Delek keta nai di Ine-Weu ai hi Lanur poli rimu uma diha. Agu hi Lanur ngo lodok lingko cebana kole. Hi Lanur ritak mese keta le loer di Ine-Weu.

            Manga ca leso kole hi Ine-Weu tako muku di Lanur. Muku di Lanur so’o ngai keta po’ongd. Mai tae di Lanur ngong hi Ine-Weu: “Oleh, Ine-Weu, hau ata takod muku daku so’o one po’ong.” “Toe ta,” wale di Ine-Weu. “Tu’u-tu’ung hau ko?” Eng-e.” “Eme nggitu wajo tapa taud ite te sua, asa?” tae di Lanur. “Nenggitu demeng ta,” wale di Ine-Weu. Hi Lanur rokot ali puka mukun. Main hi Ine-Weu rokot ali wunut. Poli hitu weing gici ca culu belang. Seto nggo’o hi Ine-Weu li Lanur, muntung keta muing hi Ine-Weu, toe manga retang koe cekoen, ampus keta taung. Tara muntungn hi Ine-Weu, ai rokot le wunuty. Hi Lanur rokot ali puka muku, itu tara toe muntungn. Wina agu anak di Ine-Weu retang kid musi mai. Main hi Lanur agu wina anakn delek nai keta, ai mata gi hi Ine-Weu. Cewen kole uma mese ata poli rimu li Ine-Weu danong diha Lanur kole morin.

Sumber: Manggarai Text V, Propinsi SVD Ruteng, Tahun 1978