Manga ca anak koe ata belek. Ca leso, mai tae de eman ngong
enden: “Co’om oke lite anak koe ho’ot belek.” Poli hitu oke lise. Ise ba anak
koe hitu nggerone ca liang. Agu bokong anak koe hitu latung bombo. Widang le
eman anak koe hitu ca acu koe. Cai one liang hitu rening lise anak koe hitu. Woko
toko temo anak koe hitu, koles ise ga one mbarud.
Ca-ca gula denge liha runing ngkiong. Mai tae danak koe hitu:
“hitu acu dema daku.” Mai taed suad ine wai darat: “Oekn-e; acu-acu bon runing
ngkiong.” Mai tae danak koe hitu: “Ai acu dema daku ga?” Woko leso pedek hia
hang latung bombo. Agu woko recis, tei liha te hang dacu koen. Agu woko toko
anak koe hitu, ba line-wai darat situ hang latang te hia. Woko to’o hia hangs
liha hang situ. Agu taen: “I…., ho’os hang ba dema daku.” Denge liha tawa
dine-wai darat situ. Mai tae diha: “Co’o tara tawas meu?” mai tae dine-wai
situ: “Tawa bogm.” Maik toe itas wekid liha. Woko neho diang gula denge kole
liha runing ngkiong. Mai kole taen: “Hitu acu dema daku.” Wantil dine-wai darat
situ: “Oekn-e, acu-acu bon runing ngkiong.”
Ca wulang musi main tu’a hia ga. Agu acu koen bece agu mese
gi. Woko lima ntaung umurn anak koe hitu, ngo hia bang acu. Woko kole hia itas
liha hang one liang hitu. Agu hia hangs hang situ. Woko tu’a gi, ngapeng liha
ine-wai situ, agu haengs liha. Mai tae dine-wai situ: “Co’om agu hau kami,
nana!” mai tae diha: “Eng demeng!” agu nekis ise ga.
Denge lise one beo manga rame, agu ise ngo landang. Agu dumuk
manga mendi do dise. Cai one pa’ang ise ronda. Agu latang lise one mai. Mai dae
deman: “Keraeng nimai so’o yo?” Mai tae diha keraeng one mai: “Tapa ta! Ho’o
mbe utengs-o, keraeng.” Mai tae de keraeng hitu: “Asa peng ema daku no’o ta de?”
Mai tae de eman: “Ai nimaid ite leng ta, keraeng?” Mai taen: “Danong aku oke le
emag.” Agu eman hitu rantang. Mai tae diha: “Neka rantang ta, ema.”Poli hitu
ise ka’eng neki ca. agu ise bora keta.
Sumber: Manggarai Texts V, Verheijen, SVD, Propinsi SVD
Ruteng 1978
Tidak ada komentar:
Posting Komentar